ចំពោះបុគ្គលដែលមានគោរមងារ ឧកញ៉ា អាចត្រូវបញ្ចប់ ឬដកហូតគោរមងារក្នុងករណី បុគ្គលទាំងនោះមិនបានបំពេញកាតព្វកិច្ចបង់វិភាគទានប្រចាំឆ្នាំរយៈពេល៣(បី)ឆ្នាំ ជាប់គ្នាដោយគ្មានមូលហេតុ។
ក្នុងព្រះរាជក្រឹត្យ ដែលឡាយព្រះហស្តលេខាកាលពីថ្ងៃពុធ បានឱ្យដឹងថា គោរមងារ ឧកញ៉ា ដែលអាចត្រូវបានបញ្ចប់ ក្នុងករណីបុគ្គលសុំលាលែងពីគោរមងារឧកញ៉ាដោយស្ម័គ្រចិត្ត។
ជាបុគ្គលមិនបំពេញកាតព្វកិច្ចបង់វិភាគទានប្រចាំឆ្នាំរយៈពេល៣(បី)ឆ្នាំជាប់គ្នា ដោយគ្មានមូលហេតុ។
ជាបុគ្គលត្រូវបានផ្តន្ទាទោសពីបទឧក្រិដ្ឋឬបទមជ្ឈិមណាមួយ និងជាបុគ្គលត្រូវបានរកឃើញថាបានប្រព្រឹត្តល្មើសនឹងមាត្រា២២ នៃព្រះរាជក្រឹត្យនេះ។
ជាបុគ្គលដែលត្រូវបានរកឃើញថា សំណុំឯកសារស្នើសុំគោរមងារឧកញ៉ារបស់បុគ្គលនោះមានការក្លែងបន្លំ។
ព្រះរាជក្រឹត្យបញ្ជាក់ថា៖ «បែបបទនិងនីតិវិធីនៃការបញ្ចប់គោរមងារឧកញ៉ា ត្រូវកំណត់ដោយអនុក្រឹត្យ»។
ក្នុងមាត្រា២២ បានឱ្យដឹងថា លោកអ្នកឧកញ៉ា អ្នកឧកញ៉ា និងឧកញ៉ា ត្រូវគោរពរដ្ឋធម្មនុញ្ញ ច្បាប់ និងលិខិតបទដ្ឋានគតិយុត្តនានារបស់កម្ពុជា ដោយប្រកាន់ខ្ជាប់នូវសីលធម៌ល្អ ប្រកបមុខរបរស្របច្បាប់ និងចៀសវាងសកម្មភាពណា ដែលធ្វើឱ្យប៉ះពាល់ដល់កិត្តិយសនិងសេចក្ដីថ្លៃថ្នូររបស់គោរមងារ«ឧកញ៉ា»។
លោក គួច ម៉េងលី ដែលមានគោរមងារជា អ្នកឧកញ៉ា ប្រាប់កាសែតខ្មែរថាមស៍ កាលពីម្សិលមិញថា ចំពោះតម្រូវការឱ្យបង់វិភាគទាន ឬមិនបង់វិភាគទាននេះ លោកមិនទាន់ច្បាស់អំពីតម្រូវការ ឬលក្ខខណ្ឌដែលតម្រូវឱ្យបង់ចំនួនប៉ុន្មាននៅឡើយ។
លោកបន្ថែមថា ប្រជាពលរដ្ឋមួយចំនួនដែលទទួលបានងារ ឧកញ៉ា មិនដឹងមានលទ្ធភាព ឬក៏អត់នោះទេ ព្រោះឧកញ៉ាខ្លះចូលរួមជួយសង្គមបានច្រើន ប៉ុន្តែនៅពេលណាមួយពួកគេមានវិបត្តិសេដ្ឋកិច្ច ដែលមិនអាចបង់វិភាគទានបាន ស្រាប់តែដកហូត ឬបញ្ចប់ងារឧកញ៉ា ក៏លោកមិនដឹងថាល្អ ឬអាក្រក់នោះដែរ ព្រោះបុគ្គលខ្លះទទួលបានងារដោយភាពងាយស្រួល ប៉ុន្តែអ្នកខ្លះទទួលបានដោយពិបាកបំផុត។
លោកបញ្ជាក់ថា៖ «ខ្ញុំមិនដឹងថាល្អ ឬអាក្រក់នោះទេ ព្រោះបុគ្គលខ្លះគាត់បានដោយងាយស្រួលពេក […] មិនបានជួយអ្វី? គួរតែសិក្សា ប៉ុន្តែអ្នកខ្លះបានដោយពិបាកដោយសារគាត់បានចូលរួមចែករំលែកដល់សង្គម និងរាជរដ្ឋាភិបាលច្រើនលើសលុប […] គាត់គួរទទួលបានងារជាអចិន្ត្រៃយ៍អស់មួយជីវិត ប៉ុន្តែលើកលែងគាត់ប្រព្រឹត្តខុសអ្វីមួយ ដែលមិនអាចទទួលយកបានទើបយើងគួរបញ្ចប់»។
លោក គួច ម៉េងលី បន្ថែមថា ឧកញ៉ាខ្លះជួយសង្គម និងរដ្ឋាភិបាលបានច្រើន ប៉ុន្តែនៅពេលពួកគេចាស់ទៅ ស្រាប់តែគ្មានលទ្ធភាពបន្តការគាំទ្រជួយក្នុងទម្រង់ណាមួយ ក៏ស្រាប់តែដកហូតវិញ គឺហាក់បីដូចជាបំភ្លេចចោលនូវសកម្មភាពដែលអ្នកមានគោរមងារឧកញ៉ា បានប្រឹងប្រែងតាំងពីដើមរហូតមក។
លោក ហ៊ុន ឡាក់ អគ្គលេខាធិការសមាគមឧកញ៉ាកម្ពុជា ប្រាប់ខ្មែរថាមស៍ កាលពីម្សិលមិញថា ដើមឡើយពុំមានច្បាប់ណាដែលអាចបញ្ចប់គោរមងារឧកញ៉ានោះទេ ប៉ុន្តែបច្ចុប្បន្នការតាក់តែងច្បាប់មួយឱ្យមានភាពជាក់លាក់ថា តើគោរមងារឧកញ៉ាអាចស្នើឡើងតាមរយៈណា ដើម្បីដាក់សំណើថ្វាយព្រះមហាក្សត្រ។
លោកបន្ថែមថា ចំពោះការតាក់តែងឱ្យមានច្បាប់ឡើងនេះ ឧកញ៉ាត្រូវរួមចំណែកកសាងជាតិ ក៏ដូចចូលរួមកិច្ចការសង្គម រួមទាំងការបង់វិភាគទាន ដើម្បីជាប្រយោជន៍ដល់សង្គម និងប្រទេសជាតិ។
លោក ហ៊ុន ឡាក់ បន្តថា ការបញ្ចប់គោរមងារឧកញ៉ា គឺពាក់ព័ន្ធនឹងចំណុចសំខាន់ៗមួយចំនួនដែរដូចជា ការមិនបង់វិភាគទាន ប៉ុន្តែមិនមែនមានន័យថា មិនបង់វិភាគទានភ្លាមត្រូវតែដកគោរមងារភ្លាមនោះទេ ទាល់តែមិនបង់វិភាគទានបីឆ្នាំជាប់ៗគ្នា ហើយក៏មានការវាយតម្លៃដែរថា តើមានមូលហេតុអ្វីខ្លះ។
លោកបញ្ជាក់ថា៖ «ករណីខាងលើនេះ រាជរដ្ឋាភិបាលនឹងចេញអនុក្រឹត្យបញ្ជាក់បន្ថែមទៀតពីលើព្រះរាជក្រឹត្យ ដែលក្រុមការងារអន្តរក្រសួង រួមទាំងសមាគមឧកញ៉ា នឹងពិភាក្សាលម្អិតក្នុងការតាក់តែងគោរមងារឧកញ៉ានៅក្នុងអនុក្រឹត្យសម្រាប់អនុវត្តបន្ត»។
អគ្គលេខាធិការសមាគមខាងលើបន្ថែមថា៖ «ចំពោះវិភាគទានដែលត្រូវបង់ប្រចាំឆ្នាំ នៅពេលនេះមិនទាន់បានកំណត់ជាក់លាក់នៅឡើយទេ ទាល់តែក្រុមអន្តរក្រសួងជជែកពិភាក្សាគ្នាជាមុនថា តើធ្វើយ៉ាងណាដើម្បីឱ្យសាកសម គឺមិនអាចតិចពេក ហើយក៏មិនអាចច្រើនពេកដែរ»។
ក្នុងព្រះរាជក្រឹត្យខាងលើបញ្ជាក់ថា ចំពោះការកំណត់អំពីគោលការណ៍ លក្ខខណ្ឌបែបបទ និងនីតិវិធីក្នុងការផ្តល់គោរមងារឧកញ៉ ជាការលើកទឹកចិត្តដល់ប្រជាពលរដ្ឋខ្មែរ ដែលមានគុណបំណាច់ក្នុងការអភិវឌ្ឍ និងកសាងជាតិ ព្រមទាំងការគ្រប់គ្រងនិងការបញ្ចប់គោរមងារឧកញ៉ា ដើម្បីធានាបាននូវសេចក្តីថ្លៃថ្នូរ ទំនៀមទម្លាប់ ប្រពៃណីល្អ សណ្តាប់ធ្នាប់សាធារណៈ សន្តិសុខជាតិ និងការអភិវឌ្ឍសេដ្ឋកិច្ចសង្គម៕