កម្ពុជារកចំណូលបាន៨៣៧ លានដុល្លារក្នុងឆ្នាំ ២០២៣ ពីការនាំចេញគ្រាប់ស្វាយចន្ទីឆៅ ធ្លាក់ចុះ ១៦,៩ ភាគរយធៀបនឹងឆ្នាំមុន នេះបើតាមរបាយការណ៍របស់សមាគមស្វាយចន្ទីកម្ពុជាកាលពីថ្ងៃចន្ទ។
របាយការណ៍នេះបានអោយដឹងថា កម្ពុជាបាននាំចេញគ្រាប់ស្វាយចន្ទីចំនួន ៦៥៦.០០០តោនក្នុងឆ្នាំ ២០២៣ ធ្លាក់ចុះ ៧,៦ ភាគរយបើធៀបនឹងឆ្នាំមុន។
ប្រហែល ៦១៨.០០០ តោន ឬ ៩៤,២ ភាគរយនៃគ្រាប់ស្វាយចន្ទីត្រូវបាននាំចេញទៅកាន់ប្រទេសវៀតណាម។
លោក អ៊ួន ស៊ីឡុត ប្រធានសមាគមស្វាយចន្ទីកម្ពុជាបានលើកឡើងថា ការធ្លាក់ចុះនៃការនាំចេញគឺជាសញ្ញាល្អសម្រាប់ឧស្សាហកម្មកែច្នៃគ្រាប់ស្វាយចន្ទីរបស់កម្ពុជា ព្រោះវាឆ្លុះបញ្ចាំងពីការកើនឡើងនៃចំនួនសហគ្រាសកែច្នៃគ្រាប់ស្វាយចន្ទីនៅកម្ពុជា។
លោកបានបន្តថា “សហគ្រាសក្នុងស្រុកកាន់តែច្រើនបានទិញគ្រាប់ស្វាយចន្ទីឆៅយកមកកែច្នៃដែលនាំឱ្យការនាំចេញទៅកាន់ប្រទេសវៀតណាមធ្លាក់ចុះ។
ស្វាយចន្ទី គឺជាដំណាំដ៏មានសក្តានុពលរបស់ប្រទេស បន្ថែមពីលើស្រូវ កៅស៊ូ ដំឡូងមី ដូងប្រេង ចេក ស្វាយ មៀនប៉ៃលិន និងម្រេច។
យោងតាមប្រភពដដែល បច្ចុប្បន្នមានផ្ទៃដីដាំស្វាយចន្ទីប្រមាណ ៧០ ម៉ឺនហិកតានៅតាមបណ្តាខេត្តចំនួន១០នៅក្នុងប្រទេសកម្ពុជា។